अख्तियार दुरुपयोग अनुसन्धान आयोगले सरकारी साक्षीविरुद्ध भ्रष्टाचार मुद्धा दायर गरेको छ । आयोगले सहसचिव झलकराम अधिकारी प्रतिवादी रहेको घुस तथा रिसवतसँग सम्बन्धित मुद्धामा सरकारी साक्षीका रुपमा रहेका विकास चापागाईविरुद्ध भ्रष्टाचार मुद्धा चलाएको छ । अख्तियारले गत चैत्र ८२ मा सहसचिव अधिकारीलाई प्रतिवादी बनाएर भ्रष्टाचार मुद्धा दायर गरेको थियो । अधिकारी राजस्व अनुसन्धान विभागको महानिर्देशक भएका बेला ७० लाख रुपैयाँ घुस लिएको अख्तियारको आरोपमा अख्तियार विशेष अदालतमा पुगेको थियो । एच के इन्टरप्राइजेज भन्ने कम्पनीविरुद्ध राजस्व चुहावट गरेको आरोपमा विभागमा उजुरी परेको थियो । त्यसपछि मुद्दाबाट जोगिन उक्त कम्पनीका सञ्चालक श्रीकृष्ण श्रेष्ठले ७० लाख रुपैयाँ दिएको र सो रकम विकास चापागाईं, देवेन्द्र केसी, रविन्द्र लामिछाने लगायतको सल्लाहमा उनीहरूको खातामा राखिएको अख्तियारको दावी थियो ।

सोही मुद्धामा सरकारी साक्षीका रुपमा आयोगले उदयपुरको चौदण्डीगढी नगरपालिका–५ स्थायी वतन भएका विकास कुमार चापागाईलाई अगाडि सारेको थियो ।
तर गत जेठ १३ गते बकपत्र गर्दा आयोगमा अनुसन्धानको क्रममा गरेको बयान तथा मिसिल संलग्न प्रमाण कागजहरुको प्रतिकूल हुने गरी बकपत्र गरेको भन्दै अख्तियारले उनीविरुद्ध ५० लाख मागबादी सहित मुद्धा दायर गरेको छ ।